Dosjet e vetingut| Vorpsi: Po ikën brezi i dytë i ish-pronarëve që s’merr zgjidhje

Kreu i Shoqatës Pronësi me Drejtësi, Myrshit Vorpsi, ishte i ftuar këtë të shtunë në studion e emisionit “Review” në Euronews Albania, ku foli në lidhje me vonesat që ka sjellë vetingu në shqyrtimin e dosjeve në gjykata.

Vorpsi tha se vonesat në gjykata po bëjnë që të vdesë dhe një brez tjetër ish-pronarësh pa marrë zgjidhje për çështjen e tokave.

“Ka ikur një brez e gjysmë dhe po ikën dhe brezi i dytë që po ikën pa marrë të drejtën e pronës. Në vitet ’90 ishte një brezë që ishte 60-70 vjeçar, që kërkonte t’i kthehej prona, sot ai brez ka ikur. Brezi i atyre që ishin 50-vjeç në vitet ’90, u ka ardhur koha që të ikin. Pra po ikën një brez e gjysmë dhe nuk kanë marrë zgjidhje në lidhje me pronat”, tha ai.

Vorpsi shtoi se gjatë 30 viteve të fundit, ish-pronarët kanë mundur të kompensohen vetëm për 2 900 hektarë, nga 14 mijë hektarë që kanë kërkuar në gjykatat shqiptare.

“Jemi në një moment që do kemi një tablo të qartë se çfarë është bërë në raport me kërkesat e pronarëve.

Sipas të dhënave zyrtare nga viti ’94 e deri më sot kërkesat e pronarëve kanë qenë që t’u ktheheshin ose kompensoheshin një sipërfaqe toke bujqësore dhe pylli bashkë prej 290 mijë hektarësh. Njëkohësisht kanë kërkuar që t’u kompensohej një sipërfaqe trualli prej 14 mijë hektarësh. Kanë kaluar 30 vjet që janë të depozituara kërkesat e pronarëve për këto shifra që unë ju dhashë. Sot mund të themi vetëm kaq që pas 30 vjetësh nga 14 mijë e 200 hektarë që kanë kërkuar ish-pronarët, u janë kthyer vetëm 2 900 hektarë tokë truall”, tha Vorpsi.

Ndiqni emisionin e plotë këtu: 

LEXONI GJITHASHTU:

• A po rikthehen shqiptarët te Kanuni? Kasmi flet për vonesat në sistemin e drejtësisë
• Gazetarja: Dëmshpërbimi i personave të larguar nga puna kap vlerën 127 mln euro
• Dosjet e vetingut| Haka: Drama e 79-vjeçarit, pret gjyqin për pensionin 2000 lekë