Ducati nderon Senna-n

Ayrton Senna nuk ishte thjeshtë një fans i makinave të shpejta, përkundrazi ai ishte një i apasionuar pas motorëve dhe saktësisht pas modelit Ducati 851 SPK. Në Sao Paulo dhe Monaco, Senna shihej rregullisht mbi motorin e preferuar. 30 vite pas ndarjes nga jeta, Ducati përkujton legjendën braziliane me edicionin special Monster Senna. Bazuar në modelin 937cc dhe motorrin Testastretta, Monster Senna ka ngjyrat e helmetës që mbante Ayrton.

111 kuaj fuqi nga motorri dy cilindërsh, amortizatorë Öhlins dhe sistemin e frenimit Brembo Stylema. Ducati Monster Senna ofron një performancë të vërtetë sportive. Monster Senna është gjithashtu 4.5 kg më i lehtë se versioni standart i Ducati Monster, që peshon 174.6 kg pa karburant. Do të prodhohen vetëm 341 motorrë të tillë dhe sejcili do të ketë pllakën e tij me emrin dhe numrin përkatës, si dhe një mbulesë të dedikuar.

Kompania Ducati nuk e ka shpallur ende çmimin por e prezantoi Monster Senna’n në pistën Enzo dhe Dino Ferrari në Imola. Një tjetër ceremoni prezantuese do të zhvillohet përpara garës të dielën. Drejtori i Përgjithshëm i kompanisë, Claudio Domenicali u shpreh i nderuar për mundësinë e përkujtimit të një kampioni të tillë.