“Duhen 2 vepra penale”- Avokati: Sa vite burg rrezikon burri që vrau gruan në Kosovë

Avokati Meshari Selimaj është shprehur se burri që vrau gruan e tij në Pejë të Kosovës rrezikon një dënim nga 10 vite deri në burgim të përjetshëm.

Komentet Selimaj i bëri në emisionin “Good Morning Albanians” në Euronews, ku tha se në Kosovë nuk mund të dënohesh përjetësisht për një vepër të vetme penale, por sipas tij, duhen dy vepra e lartë.

Sipas tij, në rastin e vrasjes së Gjyljeta Ukellës nga bashkëshorti i saj Edmond Lajçi, plotësohet kushti për burgim të përjetshëm, pasi veç akuzës së vrasjes, mbi Lajçin rëndon edhe ajo e armëmbajtjes pa leje.

“Është vrasje e rëndë, e cila kualifikohet në bazë të faktit që kemi të bëjmë me vrasjen e një anëtari të familjes. Këto janë vepra shumë të rënda penale, sidomos kemi të bëjmë edhe me rrethanat faktike kur është viktimë bashkëshortja e autorit. Dënimet janë mjaft të ashpra, minimumi nga 10 vite deri në burgim të përjetshëm.

Pastaj është edhe vepra penale e armëmbajtjes pa leje, e cila në pikëpamjen ligjore krijon mundësinë e shqiptimit të burgimit të përjetshëm. Sepse në Kosovë nuk mund të shqiptohet dënimi i përjetshëm për një vepër penale të veçantë, siç është ajo e vrasjes, pa qenë edhe një vepër e dytë, siç është ajo e armëmbajtjes pa leje.

Pra kemi të bëjmë me mbajtjen e paautorizuar të armës, e cila është përdorur pastaj për ta kryer edhe aktin, siç shihet nga të dhënat që jep edhe zëdhënësi i Prokurorisë. Vdekja ka ardhur si pasojë e një plumbi që ka qenë fatal në kokë, në pjesën kryesore të trupit të njeriut. Pra qëllimi ka qenë marrja e jetës së të ndjerës në këtë rast”, tha Selimaj.

LEXONI GJITHASHTU:

• Një grua vritet nga bashkëshorti i saj në Pejë
• Vrasja në Pejë: Bashkëshorti e qëlloi gruan 2 herë në kokë, në banesë dhe 3 fëmijët