E kryqëzuan për dështimet, Putin e emëron shef të shtabit të forcave tokësore

Rusia ka emëruar gjeneral-kolonelin Alexander Lapin si shef të shtabit të forcave tokësore të vendit, njoftoi të martën agjencia shtetërore e lajmeve TASS. Emërimi i tij në këtë post vjen pavarësisht kritikave të ashpra në adresë të tij për performancën në Ukrainë.

Lapin, më parë komandant i distriktit qendror ushtarak të Rusisë, u sulmua tetorin e kaluar nga aleatët e presidentit Vladimir Putin pasi forcat ruse u dëbuan nga qyteti Lyman në Ukrainën lindore, një qendër kryesore logjistike.

Emërimi i tij pason ndryshime të tjera gjithëpërfshirëse në udhëheqjen ushtarake të Rusisë gjatë luftës 11-mujore. Luftë në të cilën forcat e Moskës kanë mundur të pushtojnë zona të mëdha të Ukrainës jugore dhe lindore, por kanë pësuar një sërë disfatash dhe tërheqjesh të dhimbshme.

Më 8 tetor, Rusia emëroi gjeneralin e Forcave Ajrore Sergei Surovikin si komandantin e përgjithshëm të forcave të saj në Ukrainë , menjëherë pas shkarkimit të raportuar të komandantëve të distrikteve ushtarake Lindore dhe Perëndimore.