Ecclestone kritikon pa mëshirë Hamiltonin: Ai duhet të dalë në pension, tani!

Sezoni debutues i Lewis Hamilton me Ferrarin po rezulton një dështim i vërtetë. Shtatë herë kampioni i botës nuk ka arritur ende të ngjitet në podium pas 14 garash dhe performanca e tij me “kokëkuqen” po kthehet në një makth të përsëritur. I vetmi moment gëzimi për britanikun këtë vit mbetet fitorja në garën Sprint në Kinë.

Hamilton aktualisht renditet në vendin e gjashtë me vetëm 109 pikë, një distancë e madhe nga lideri i kampionatit, Oscar Piastri, i cili ka grumbulluar 175 pikë. Madje edhe shoku i tij i skuadrës, Charles Leclerc, është një hap para me 151 pikë.

Në këtë kontekst kritikash të vazhdueshme, së fundmi ka ndërhyrë edhe Bernie Ecclestone, ish-bosi i Formula 1. Në një intervistë për Daily Mail, 94-vjeçari nuk kurseu aspak komentet e ashpra për Hamiltonin.

“Lewis është shumë i talentuar, ai ishte dhe ndoshta është ende. Por, si me shumë kampionë, kur arrijnë majën, rruga më pas është vetëm poshtë. Ai është i lodhur. Ka bërë të njëjtën gjë për kaq shumë kohë dhe ka nevojë për një rivendosje të plotë. Mendoj se duhet të kishte dalë në pension prej kohësh,” u shpreh Ecclestone.

Ai madje i rekomandon Hamiltonit të kërkojë një marrëveshje për t’u larguar nga Ferrari menjëherë:

“Nëse do të isha agjenti i tij, do të negocioja me Ferrarin dhe do t’u thosha: ‘Nëse keni dikë për ta zëvendësuar, Lewis është gati të largohet’. Dhe nëse do të isha Lewis, do të kërkoja të më paguhet e gjithë kontrata. Do të thoja: ‘Nuk po funksionon, mund të largohem, por kjo është marrëveshja’.”

Sipas miliarderit britanik, Hamilton nuk ka më nevojë të rrezikojë:

“Ai ka fituar shtatë tituj botërorë. Mjafton. Nuk ka asgjë më për të provuar.”

Në një sezon ku pritshmëritë ishin të larta, zhgënjimi po thellohet. Fjalët e Ecclestone mund të jenë të ashpra, por pasqyrojnë një realitet të hidhur për një kampion që dikur dominonte sportin.

LEXONI GJITHASHTU: 

• Nga Fangio te Hamilton – Kampionët më të vjetër në Formula 1
• FIA skualifikon Russell, Hamilton fitues në Spa