Ekskluzive| Kardinali shqiptar Ernest Troshani mesazh për zgjedhjen e Papës së ri

Kardinali shqiptar Ernest Troshani ishte i ftuar këtë të premte në Euronews Albania, ku komentoi emocionet e zgjedhjes së Papës së ri, Leonit XIV, në krye të Vatikanit.

Troshani u shpreh se besimtarët katolikë dhe mbarë bota kanë tashmë një Papë të ri të fuqishëm, 69-vjeçar, të cilin e cilësoi si “mëkëmbës të Krishtit”.

“Papa është mëkëmbës i Krishtit. Votuam për zgjedhjen e një Pape të ri, të fuqishëm, 69-vjeçar, që është kardinali i Çikagos. Ky ka pasur edhe gjatë kohës së Papa Françeskut detyra të rëndësishme dhe është i njohur në mbarë botën. Është i pari Papë nga komuniteti amerikan,” tha Troshani.

Ai theksoi se zgjedhja e Papës së ri është një gëzim i madh për të gjithë katolikët, pasi me të, “Krishti gjen drejtuesin, udhëheqësin, shpresën dhe mbi të gjitha fuqinë e të Ngjallurit”.

Kardinali shqiptar vlerësoi gjithashtu kontributin e Papa Françeskut në mbështetje të shqiptarëve dhe u shpreh i bindur se Papa i ri do t’i sjellë botës paqen e shumëdëshiruar.

“Papa Françesku, e keni parë vetë, që ka qenë me dëshirën më të madhe për shqiptarët. E pamë që para pesë muajsh, kur ishim bashkë, brohoriti: ‘Rroftë populli shqiptar, rroftë Shqipëria’. Papa Leoni XIV do t’i sjellë botës atë paqe të dëshirueshme për të pajtuar zemrat e njerëzve”, tha Troshani.

LEXONI GJITHASHTU:

• Papa Leoni XIV do kremtojë sot Meshën e parë të Shenjtë në Kapelën Sistine
• Profil/ Kush është Robert Prevost, Papa i parë amerikan