Ekspertë të huaj për hetimin e zjarrit në spitalin e Tetovës

Qeveria e Maqedonisë së Veriut do të angazhojë ekspertë të huaj për të hetuar shkaqet e zjarrit që përfshiu spitalin COVID në Tetovë e që shkaktoi të paktën 14 të vdekur dhe 12 të lënduar. Këtë ka bërë të ditur zv.kryeministri i Artan Grubi.

“Sot kemi dërguar kërkesën, ka pasur kontakte mes vendeve, në veçanti me ambasadoren e gjermane, me autoritete e NATO-s dhe SHBA dhe ata mund të vijnë dhe të shqyrtojnë prova që janë marrë në vendin e ngjarjes”, tha ai.

Ministria e Shëndetësisë hodhi poshtë pretendimet se janë konstatuar probleme gjatë ndërtimit të spitalit që mund të kenë shkaktuar zjarrin e mbrëmshëm. Kjo çështje sipas Grubit është diskutuar edhe në mbledhje qeverie.

“U diskutua në mbledhjen e qeverisë kjo çështje dhe vetë drejtori ka dhënë sqarimet e tij”, tha ai.

I pyetur nga gazetarët në duhet të mbaj dikush përgjegjësi për zjarrin zv. ministri i shëndetësisë Ilir Hasani tha se kjo do të zbardhet nga hetimi.

“ Nuk është koha e dorëheqjeve. Është koha kur ne duhet të ballafaqohemi me sfidat, organet janë të angazhuara dhe ne pro presim raportet zyrtare të tyre”, tha ai.

Kryetarja e komunës së Tetovës, Teuta Arfi bëri të ditur se mes viktimave dhe të plagosurve nuk ka personel mjekësor. Qeveria në mbledhjen e sotme ka shpallur tre ditë zi kombëtare.

LEXONI GJITHASHTU: 

• Të paktën 14 viktima nga zjarri në spitalin e COVID-19 në Tetovë
• Përfshihet nga zjarri spitali i COVID-19 në Tetovë, raportohet për viktima