Ekspertja e IT: Ka indicie të sigurta për sulme kibernetike nga muxhahedinët

Ekspertja e IT Esmeralda Kazia komentoi në një intervistë për “Good Morning Albanians” në Euronews Albania deklaratën e grupit të hakerave iranianë “Homeland Justice”. Këta të fundit reaguan përmes një postimi në Telegram pas tensioneve që u krijuan me policinë, e cila zhvilloi kontrolle brenda kampit të muxhahedinëve.

“Keni ftuar djallin në shtëpi, tani po korrni frytet e punës suaj,” – shkruajnë ata bashkangjitur një lajmi ku MEK pretendon për një të vrarë nga sulmet e policisë, ndërsa kjo e fundit ka bërë me dije se diçka e tillë nuk është e vërtetë.

“Në sigurinë kibernetike asnjëherë nuk mund të jemi 100% të sigurt, sepse lufta që bëhet sot është lufta e të dhënave. Lufta për marrjen e të dhënave dhe shkatërrimin e tyre janë dy luftëra që nuk mund të fitohen asnjëherë 100%, por ne thjesht duhet të marrim masa për të ulur numrin e viktimave. Padyshim mund të themi se nga kampi ku janë strehuar muxhahedinët mund të jenë kryer sulme kibernetike kundrejt vendeve të tjera; nuk jemi të sigurt nëse janë kryer dhe kundrejt Iranit. Mendoj që reagimet nga SPAK apo policia janë nisur me indicie të sigurta,” – u shpreh Kazia.

LEXONI GJITHASHTU:

• Zbardhet hetimi i SPAK për banorët e MEK, rreth 150 pajisje të sekuestruara
• Aksioni në MEK| Provokon gazetari: Rama e bën që ta marrin në telefon ndërkombëtarët