“El Clasico” me vlerë trofeu: Barcelona kalon në finalen e Kupës, e pret Reali

Barcelona ka mposhtur minimalisht Atletikon në gjysmëfinalen e Kupës së Mbretit në Spanjë, duke siguruar biletën për finalen e madhe, aty ku do të përballet me Realin e Madridit.

Një gol i Ferran Torres i ka mjaftuar Barcelonës për të siguruar një vend në finalen e madhe të Kupës së Mbretit në Spanjë, aty ku e presin “Los Blancos”. Në Wanda Metropolitano pritej një duel edhe më i vështirë për blaugranët, por këta të fundit nuk e lejuan Simeonen dhe skuadrën e tij të bënte lojën karakteristike me duele të ashpra e mbrojtje të ngjeshur.

Vendësit u treguan të ashpër që në nisje, ndërsa shpresonin për një gol të shpejtë, e më pas të mbronin rezultatin, por kjo gjë nuk ndodhi. Një pasim fenomenal nga Yamal gjeti të lirë sulmuesin Torres, i cili mposhti portierin në ballafaqimin e parë me të, duke zhbllokuar kështu rezultatin. 45 minutat e para prodhuan vetëm një gol, por edhe 6 kartonë të verdhë, 5 për “Los Colchoneros” dhe 1 për miqtë nga Barcelona.

Në fraksionin tjetër, Simeone e nisi me ndryshime për t’i dhënë frymë sulmit, e një prej tyre ishte sulmuesi Sorloth, i cili rrezikoi jo pak herë portën kundërshtare, por i mungoi saktësia. Shifrat mbetën të pandryshuara deri në fund, me disa raste të shpërdoruara, por të drejtën për të kaluar në finale e ka Barcelona. Aty e pret Reali i Madridit në një duel edhe më spektakolar, një klasike e futbollit spanjoll.