Elbasan/ Rriten rastet e dhunës në familje, 500 kërkesa për urdhër mbrojtje në 2024

Elbasani ka shënuar një rritje të ndjeshme të rasteve të dhunës në familje. Gjatë katër viteve të fundit, në gjykatë janë regjistruar mbi 500 kërkesa për urdhra mbrojtje.

Vetëm gjatë vitit 2024 janë regjistruar 168 kërkesa për lëshim urdhërmbrojtjeje, nga të cilat janë pranuar 115.

Psikologët theksojnë se rritja e dhunës pas pandemisë është shqetësuese, dhe faktorët që kontribuojnë janë të shumtë, ndërsa shkaqet kryesore mbeten ato ekonomike, mentaliteti dhe marrëdhëniet e tensionuara në familje.

“Pas pandemisë kemi parë një dyfishim të rasteve të dhunës në familje. Shkaqet janë të ndryshme, por ekonomia, mentaliteti dhe marrëdhëniet në familje mbeten faktorët kryesorë që ndikojnë në këtë fenomen”, thotë piskologia Mirela Gjoni.

Një tjetër aspekt shqetësues është vrasja e 17 grave gjatë vitit 2024 nga partnerët, ish-partnerët apo të afërmit. Psikologët e konsiderojnë këtë si një alarm të rëndësishëm për shoqërinë shqiptare, duke theksuar nevojën për masa parandaluese më të forta dhe mbështetje për viktimat.

“Nga janari deri tani, 17 gra janë vrarë nga bashkëshortët, ish-bashkëshortët apo partnerët intimë. Ky është një numër shqetësues dhe tregon një ashpërsim të dhunës në familje. Edhe pse institucionet kanë marrë disa masa, është e nevojshme që ato të shoqërohen me mbështetje financiare dhe burime të mjaftueshme”, thotë piskologia Mirela Gjoni.

Një thirrje e fortë vjen edhe nga drejtuesja e Forumit të Gruas Elbasan, Shpresa Banja, e cila nënvizon rëndësinë e denoncimit të dhunës dhe jo durimin e saj.

“Dhuna në familje nuk është më një vepër civile, por penale, dhe për këtë arsye, njerëzit duhet të mendojnë mirë para se të ushtrojnë dhunë. Ligji parashikon deri në 5 vjet burg për këdo që ushtrojnë dhunë. I bëj thirrje të gjitha grave dhe vajzave që të mos e durojnë dhunën, por ta denoncojnë”. thotë shpresa Banja, Drejtore e Forumit të Gruas Elbasan.

Specialistët që punojnë çdo ditë me këtë kauzë theksojnë se, përkundër numrit të lartë të rasteve, ka pasur një rritje të dukshme të ndërgjegjësimit dhe sensibilizimit të grave për të denoncuar dhunën.

Kjo situatë kërkon një angazhim të bashkërenduar të institucioneve dhe shoqërisë për të parandaluar dhunën në familje dhe për të mbrojtur viktimat.

LEXONI GJITHASHTU:

• “Marrim borxh për të festuar”, qytetarët në Elbasan shprehen të pakënaqur me çmimet
• Dhuna në familje, në Elbasan rriten denoncimet e prindërve të dhunuar nga djemtë