Emërimet në “Kushtetuese” në fazën finale, KED jep pikët për kandidatët në garë

Jo vetëm SPAK, por edhe Gjykata Kushtetuese do të ndryshojë kryetarin e saj.

Holta Zaçaj, me mandat të përfunduar, është në ditët e fundit si gjyqtare me detyrë kryetare e Kushtetueses.

Konkurrimi për gjashtë kandidatët është drejt fundit. Ata po i nënshtrohen vlerësimit me pikë nga Këshilli i Emërimeve në Drejtësi, dhe brenda javës së ardhshme pritet të shpallen tre më të votuarit.

Fjalën e fundit e thotë Gjykata e Lartë, si institucioni përgjegjës për të plotësuar vakancën e krijuar në Kushtetuese.

Në një mbledhje të posaçme, trupa e Gjykatës së Lartë do të votojë për tre gjyqtarët me pikët më të larta.

Ai ose ajo që merr më shumë vota, fiton edhe karrigen e gjyqtarit në institucionin më të lartë të drejtësisë – Gjykatën Kushtetuese.

Në garë janë emra të njohur, me kontribute në institucione të ndryshme të drejtësisë – nga vetë Gjykata e Lartë, Këshilli i Lartë Gjyqësor, e deri te strukturat e Vettingut të krijuara pas reformës në drejtësi, si KPA dhe KPK.

Pas largimit të Holta Zaçajt, Gjykata Kushtetuese pritet të përtërihet edhe me dy anëtarë të tjerë – një i propozuar nga Presidenti dhe një nga Kuvendi.

Kjo procedurë do të nisë pasi gjyqtarët e GJK-së të mblidhen në një seancë të parashikuar në mesin e tetorit, ku do të përcaktojnë me vendim përfundimtar kohëzgjatjen e mandateve të tyre.

Me largimin e Holta Zaçajt, vetë trupa e GJK-së do të duhet të zgjedhë mes tyre kryetarin e ri të Kushtetueses.

LEXONI GJITHASHTU:

• Vakanca në Gjykatën Kushtetuese/ KED interviston kandidatët, nesër vendoset renditja