Emocionohet Kastro Zizo: Çmimi nga New York më ka shokuar, nuk e prisja

Artisti jo fort i zakonshëm, Kastro Zizo i cili tërheq gjithmonë vëmendje është vlerësuar me çmimin “Artisti i Vitit” për vitin 2022, për arritjet dhe kontributin si artist dhe aktivist i të drejtave të njeriut.

Në një intervistë për “Good morning Albanians” ai tha se nuk e priste çmimin nga New York.

“Unë jam ende pak në shok sepse erdhi në momentin më të papritur kur unë e dëshiroja më së shumti. Realisht jam ende shumë i emocionuar dhe jam pak kështu si në gjendje shoku,” – u shpreh Zizo.

Vlerësimi me këtë çmim u bë i mundur prej propozimit të komunitetit artistik të New York-ut dhe me kërkesë nga zyra e senatorit të SHBA-së në New York, z. Chuck Schumer.

Çmimi iu dha Kastro Zizos si simbolikë në Ditën Botërore të të Drejtave të Njeriut nga Organizata e Kombeve të Bashkuara. Është hera e parë që këtë çmim e fiton një shtetas jo amerikan.