EMRI/ Makina përplas të riun me motor, humb jetën 17-vjeçari në Vlorë

Një 17-vjeçar ka humbur jetën pasi një makinë është përplasur me motorin me të cilin ai po lëvizte.

Aksidenti ndodhi rreth orës 00:10 të datës 28 tetor 2025, në bulevardin “Ismail Qemali”, në afërsi të një marketi.

Sipas burimeve zyrtare, mjeti me targë AB737UI, që drejtohej nga Haiti Bajramaj, 32 vjeç, është përplasur me motomjetin me targë CA305, që drejtohej nga Leandro Shametaj, vetëm 17 vjeç.

I riu u transportua me urgjencë në Spitalin Rajonal të Vlorës, por, pavarësisht përpjekjeve të mjekëve, nuk mundi t’i mbijetonte plagëve të marra.

Drejtuesi i automjetit, Haiti Bajramaj, është shoqëruar nga policia në ambientet e DVP Vlorë, ndërsa grupi hetimor po punon për të zbardhur rrethanat e plota të aksidentit tragjik.

Sipas dëshmitarëve në vendngjarje, përplasja ka qenë fatale dhe 17-vjeçari ka ndërruar jetë menjëherë ndërsa në njoftimin zyrtar policia thotë se drejtuesi i automjetit ka qenë në gjendje të dehur.

“Specialistët e Seksionit të Trafikut Urban dhe Interurban Vlorë arrestuan në flagrancë, për veprat penale “Drejtimi i automjeteve në mënyrë të parregullt” dhe “Shkelja e rregullave të qarkullimit rrugor”, shtetasin H. B., 32 vjeç, banues në Vlorë, pasi më datë 28.10.2025, rreth orës 00:15, në bulevardin “Ismail Qemali”, duke drejtuar automjetin tip “Porsche”, në gjendje të dehur, është përplasur me motomjetin tip “Trinity”, me drejtues një shtetas të mitur, 17 vjeç, i cili si pasojë, ka ndërruar jetë”, njofton policia.

Makina përplas të riun me motor, humb jetën 17-vjeçari në Vlorë pic.twitter.com/Qx73kHaCn0

— Euronews Albania (@EuronewsAlbania) October 28, 2025

Sipas burimeve, i riu po kthehej me motor nga puna si kamarier, kur u përplas nga automjeti.

Ngjarja ka tronditur familjarët dhe miqtë e tij, të cilët janë ende në gjendje shoku, ndërsa vetëm pas pak ditësh, i riu do të festonte ditëlindjen e tij të 18-të, por jeta iu ndërpre në mes në mënyrë tragjike.

Në orën 09:00 të mëngjesit të së martës, trupi i pajetë i të riut ka dalë nga morgu i Vlorës pasi i është bërë autopsia dhe është nisur drejt familjes së tij me makinën funerale.

LEXONI GJITHASHTU:

• Foto e 17-vjeçarit, u përplas nga Porsche kur po vinte me motor nga puna si kamarjer
• Nipi humbi jetën nga aksidenti në Vlorë, flet gjyshi i të riut: Po kthehej nga puna
• Aksidentoi për vdekje të riun me motor, arrestohet shoferi, policia: Ishte i dehur