Endoskopia e pacertifikuar, Alimehmeti: Humbëm besimin në sistem

Ekzaminimi i pacientëve me pajisje endoskopike të montuar në Shqipëri nga një kompani e pacertifikuar për këtë proces, fakt ky i bërë publik nga Kontrolli i Lartë i Shtetit ka ngritur dyshimet mbi shërbimin që ju është ofruar pacientëve përgjatë një viti.

Mjeku ilir Alimehmeti, njëlloj si audituesit thotë se dëmi është i pallogaritshëm dhe kjo jo për faj të mjekëve.

“Është shumë e rëndë që këto probleme i gjejmë nga Kontrolli i Lartë i Shtetit. Në këtë rast kemi të bëjmë një situatë alla shqiptarçe. Rasti aktual është flagrant, jemi duke folur me pajisje të ndryshe të montuar nga një firmë e cila nuk dihet a e ka aftësinë profesionale, të paktën me letra se ka… shpresoj të mos kenë shkaktuar probleme, por nga krahu tjetër nuk kemi një metodë për ta vërtetuar këtë, nëse janë shkaktuar, çfarë dhe sa rëndë. Dimë të sigurt që nuk është garantuar cilësia më e lartë e shërbimit dhe kjo jo për faj të mjekëve që operojnë me atë pajisje”, tha Alimehmeti.

Ndërsa askush nuk e di saktësinë e këtyre ekzaminimeve, ajo çfarë Alimehmeti beson se ka ndodhur është humbja e besimit tek sistemi.

“Nuk e llogarisim dot sa është dëmi, por dimë diçka që është  një tjetër dëm i pallogaritshëm, që është besimi tek kujdesi shëndetësor”, shprehet ai.

Qendra Spitalore Universitare “Nënë Tereza” muaj më parë mori dhe kartën e autonomisë menaxheriale, e cila bazohet në përmbushje të kritereve të cilësisë.

LEXONI GJITHASHTU:

• Largimi i Ficos nga drejtimi i QSUT, Koçiu: S’ka lidhje me zjarrin te Urgjenca
• KLSH: Spitali i ri në QSUT me shtretër të përdorur, asnjë pajisje sipas kontratave