Europol godet organizatën kriminale: 28 të ndaluar, përfshirë shqiptarë dhe italianë

Një operacion i përbashkët i autoriteteve italiane me mbështetjen e Europolit ka çuar në arrestimin e 28 personave të dyshuar për përfshirje në një rrjet të gjerë trafiku droge, me bazë në Itali dhe lidhje në Spanjë e Shqipëri. Aksioni u zhvillua më 8 korrik 2025 në disa rajone të Italisë, si dhe në disa qytete të Spanjës dhe Shqipërisë, ku u godit një strukturë kriminale që besohet se është pjesë e organizatës mafioze ‘Ndrangheta.

Në mesin e të ndaluarve është një shtetas italian nga Kalabria, i dyshuar si organizatori kryesor i trafikut të kokainës në zonën e San Basilios në Romë. Ai akuzohet se ka bashkëpunuar ngushtë me një grup kriminal shqiptar, i cili ka pasur rol kyç në logjistikën e trafikut – duke përfshirë nxjerrjen e ngarkesave nga portet spanjolle dhe holandeze, transportin drejt Italisë dhe shpërndarjen e drogës në pjesë të ndryshme të kryeqytetit.

Sipas hetimeve, rrjeti ka trafikuar të paktën 1019 kilogramë kokainë dhe 1497 kilogramë hashash në 80 episode të ndryshme. Lënda narkotike, e blerë në Amerikën e Jugut, dyshohet se është futur në Evropë përmes kontejnerëve, në porte si ai i Gioia Tauro në Kalabri, ku bashkëpunëtorë të mafies kalabreze ndihmonin në shpërndarjen e saj më tej në territorin italian.

Autoritetet kanë dokumentuar edhe një rast dhune të rëndë, ku katër shtetas italianë akuzohen për rrëmbimin dhe torturimin e një trafikanti droge. Akti është filmuar me celular dhe videoja është përhapur brenda rrjetit kriminal, për të krijuar frikë dhe për të ruajtur kontrollin mbi anëtarët e organizatës në Romë.

 Të arrestuarit do të përballen me akuza për trafik ndërkombëtar droge, pjesëmarrje në organizatë kriminale dhe rrëmbim me dhunë. Hetimet vijojnë.

LEXONI GJITHASHTU:

• Gjykata spanjolle dënon Carlo Ancelottin me një vit burg për mashtrim tatimor
• Erion Veliaj mbetet në burg, reagojnë avokatët ndërkombëtarë: Shkelje e të drejtave