Fabian Topollaj: Askush s’ka interes për shkarkimin e Metës, përfshirë Ramën

Fabian Topollaj, pedagog i të Drejtës Kushtetuese thotë se kryeministri Rama i ka votat e nevojshme për të zgjedhur presidentin e ri në raundin e katërt dhe të pestë pasi ka 74 vota në Parlament.

Sipas tij, në këtë situatë, kreu i qeverisë nuk ka ndonjë interes të veçantë për shkarkimin e Metës.

“Të gjithë palët nuk kanë ndonjë interes të veçantë që ta heqin që nesër Ilir Metën, duke filluar nga Edi Rama”, tha Topollaj.

“Procesi për zgjedhjen e Presidentit do të jetë i njëjtë edhe po u shkarkua Meta”, shtoi ai.

Gjykata Kushtetuese do të mbajë të enjten seancë për shkarkimin e Metës, ku pritet të dëgjohen pretendimet e Presidentit.

Ende nuk dihet nëse do të ketë vendim, ndërsa ligji për funksionin e Gjykatës Kushtetuese njeh një afat prej 30 ditë për vendimmarrje.

Mandati i Metës si President përfundon në fund të muajit prill dhe Kushtetuta parashikon nisjen e procedurave për zëvendësimin e tij 60 ditë përpara.