Udhëheqësit ndërkombëtarë të tenisit deklaruan se tenisti serb, Novak Gjokoviç, i cili shkroi “Kosova është zemra e Serbisë” në një kamerë në French Open, nuk i ka shkelur rregullat e garës pasi që “deklaratat politike nuk janë të ndaluara”.

Gjokoviq e mbrojti veprimin e tij gjatë një interviste të dhënë për media serbe, duke thënë se Kosova është “djepi, kalaja” e Serbisë.

Federata Ndërkombëtare e Tenisit (ITF), organi drejtues i sportit, tha se kishin marrë një kërkesë nga Federata e Tenisit të Kosovës që kërkon që Gjokoviç të dënohet për veprimet e tij, por sipas tyre kjo gjë nuk do të ndodh.

Sipas asaj që shkruan REL, Federata Ndërkombëtare e Tenisit ka theksuar se deklarata të tilla nuk bien ndesh me rregulloret për garat e Grand Slams, si French Open.

“Rregullat për sjelljen e lojtarëve në një garë të Grand Slam rregullohen sipas rregullores së Grand Slam, e administruar nga organizatori dhe rregullatori përkatës. Nuk ka asnjë dispozitë në këtë rregullore që ndalon deklaratat politike”, tha një zëdhënës i ITF-së në një deklaratë të dërguar me email.

Gjokoviç do të përballet më 31 maj me tenistin hungarez, Marton Fucsovics.

Kryetari i Komitetit Olimpik të Kosovës, Ismet Krasniqi, kishte thënë një ditë më parë se “Gjokoviç ka promovuar sërish propagandën e nacionalistëve serbë dhe ka përdorur platformën sportive për ta bërë këtë”.

LEXONI GJITHASHTU: 

• Novak Gjokoviç fiton për herë të 10-të në Australian Open
• “Kosova zemra e Serbisë”, Komiteti Olimpik i Kosovës kërkon ndëshkimin e Gjokoviç