Një grup fëmijësh jetimë në Ukrainë, të moshave nga 1 deri në 2 muaj, kanë arritur të sigurt në një spital të Kievit, ku pritet t’u ofrohet ndihma e duhur shëndetësore.

Bëhet fjalë për më shumë se 70 fëmijë të sapolindur, të cilët i kanë kaluar dy javët e fundit në strehat e qytetit Sami, në veri-lindje të vendit, për t’u mbrojtur nga bombardimet.

Shumica e tyre janë transferuar në qytetin perëndimor të Lvivit, por të tjerë, për shkak të gjendjes shëndetësore, u detyruan të ndaleshin në Kiev, në një spital të specializuar në ndërhyrjet kirurgjike.

“Këta fëmijë nuk kanë prindër. Ata kanë lindur këtë vit dhe jetonin në jetimore. Disa prej tyre janë 1-muajsh, të tjerë 2-muajsh. Ata u ndodhën në vijën e frontit, në një situatë ku u duhej ndihmë por nuk ishte askush për t’i ndihmuar pasi luftimet kishin filluar. Ata u sollën këtu me ambulancë, të shtrirë në barela. Duhet të shkonin deri në Lviv, por i mbajtëm këtu sepse ishin në gjendje kritike”, u shpreh Borys Todurov, mjek kirurg në Kiev.

Mjekët e spitalit shpresojnë që t’i operojnë së shpejti fëmijët që kanë probleme me zemrën, por druhen se vazhdimi i sulmeve nga forcat ruse, të cilat synojnë të depërtojnë në kryeqytetin Kiev, mund t’i pengojë në misionin e tyre.