Festë dhe protestë për 8 mars, lulet mbushin rrugët e qytetit, të tjerë protestojnë për të drejta

Dita Ndërkombëtare e Gruas, 8 marsi, ashtu si çdo vit tjetër, edhe këtë herë lulëzoi rrugët e qytetit përmes buqetave me lule.

Ndonëse një festë ndryshe për shkak të kufizimeve të pandemisë, qytetarët kanë zgjedhur të gëzojnë nënat, gratë dhe vajzat e tyre.

“Njërën [lule] e kam për time shoqe, tjetrën e për komshien, do u uroj sot 8 marsin,” – tha një i moshuar.

“[…] për këtë pandemi që kemi ne nuk na shkon mendja për 8 mars,” – shprehet një zonjë.

“Ka vite që e festojmë po nuk duhet të dalim në fakt,” – tregon një tjetër.

“Ne si pensionist në shtëpi, mirë. Vetëm të jemi mirë me shëndet,” – shton një zonjë tjetër.

E ndërsa disa gra zgjedhin ta festojnë këtë ditë, të tjerë dolën në protestë.

Tetë marsi për ta është një ditë reflektimi për rolin e grave dhe vajzave në shoqëri, ndaj kërkojnë respektimin e të drejtave.

“Mendoj se duhet ta ngremë zërin, jo vetëm për të festuar. Burrat duhet të kuptojnë rolin e tyre të privilegjuar në familje,” – thotë një protestuese.

“Gruaja sot vazhdon të mbetet e pa-përfaqësuar, pa dinjitet, pa të drejta dhe e shfrytëzuara në shtëpi,” – shtoi një tjetër.

Ky 8 mars erdhi krejt ndryshe, pikërisht për shkak të pandemisë së COVID-19, e cila prej thuajse një viti ka rënduar edhe më tej pozitën e grave dhe vajzave në shoqëri. 

Për shkak të thellimit të varfërisë janë shtuar rastet e dhunës në familje, ndërsa një pjesë e mirë e tyre janë pa punë për shkak të mbylljes së disa aktiviteteve.