Fitojnë punonjëset, “mundet” pronari i rrobaqepësisë së Bilishtit

Protesta e punonjësve të rrobaqepësisë në Bilisht duket se ka sjellë zgjidhjen e problematikave të ngritura prej tyre.

Korrespondenti i Euronews Albania në Korçë, Xhensil Shkëmbi raportoi se protesta e ngritur para tre ditëve nga 150 punonjëse pasi pronari i një rrobaqepësie pushoi nga puna kryetaren e sindikatës, Mirjeta Mullën, ka përfunduar në favor të grave.

“Përveç kësaj ato protestonin edhe për mungesën e kushteve optimale të punës dhe gjithashtu për shkak se pronari kohët e fundit kishte hequr 40-50 mijë lekë të vjetra nga sektori i prerjes për ato gra që punojnë në atë sektor,” – u shpreh Shkëmbi.

Të enjten inspektoriati i punës pezulloi aktivitetin e biznesit pasi nuk ishte respektuar liria sindikale e punonjësve.

Euronews Albania ka mësuar përmes kryetares së sindikatës, Mirjeta Mulla, se të gjitha rrobaqepëseve u është komunikuar rikthimi në punë nga pronari dhe se ky i fundit do të njohë sindikatën e ngritur nga vetë ato, që shërben për të përcjellë të gjitha problematikat.

LEXONI GJITHASHTU:

• Protesta zgjidh problematikat e punonjëseve të fasonërisë në Bilisht
• Punonjëset e fasonerisë në Bilisht protestojnë