Foda vlerëson lojtarët e thirrur: Kemi një ekip të mirë, të luajmë të bashkuar

Kosova ka nisur përgatitjet në prag të ndeshjes së parë kualifikuese drejt kupës së botës, ku të premten ndeshet me Zvicrën në transfertë. Më herët trajneri Franco Foda publikoi listën me lojtarët e thirrur, ndërsa këtë të hënë iu përgjigj interesit të gazetarëve.

“Jemi në grup shumë të vështirë. Zvicra, Sueda e Sllovenia janë ekipe me shumë cilësi. Pavarësisht këtyre, gjithçka është e mundur. Ne kemi cilësitë tona po ashtu. Vendi i parë kualifikohet direkt, por ekziston edhe mundësia që nëpërmjet play-off. Do të shohim si do të shkojë, ne luajmë futboll, jetojmë për futbollin”, tha Franco Foda, trajner i Kosovës.

Më tej tekniku analizoi duelin hapës të këtij rrugëtimi atë ndaj kombëtares helvete.

“Do të fitojmë apo jo, kjo shihet ditën e ndeshjes. Nuk jam parashikues, por sigurisht kemi ndërtuar ekip të mirë dhe kemi vetëbesim, pasi në ndeshjet e kaluara kemi treguar lojëra të mira. Zvicrën e njohim mirë, por vendimtare është si do të paraqitemi në fushë. Nëse paraqitemi të bashkuar kam besim që do të fitojmë ose së paku të barazojmë”, shtoi Foda.

Kosova bën pjesë në grupin B kualifikues të Kupës së Botës së bashku me Zvicrën, Suedinë dhe Slloveninë.

LEXONI GJITHASHTU:

• Skënderbeu U-19 mëson kundërshtarin në Europë, starton ndaj moldavëve
• Nis viti ri shkollor në RMV, 245 mijë nxënës ulen në bankat e shkollës