Fruthi| Tomini: Pas 4-5 ditësh fëmija mbushet me pika të kuqe nga koka te këmbët

Drejtoresha e Institutit të Shëndetit Publik, Eugena Tomini, është shprehur se fëmijët që preken nga Fruthi mbushen me pika të kuqe nga koka te këmbët.

Komentet Tomini i bëri në emisionin “Good Morning Albanians” në Euronews, ku tha se shfaqja e pikëzimit vjen 4-5 ditë pas prekjes nga fruthi.

Ajo tha gjithashtu se disa nga shenjat e tjera të fruthit janë edhe temperatura e lartë, kolla, skuqja e syve, etj.

“Nëse unë jam me fruth, duhet të gjurmohen të gjitha kontaktet me persona të tjerë. Nuk kemi vetëm shfaqjen e shenjave të sipërme respiratorë që janë skuqja dhe lotimi i syve, kolla prezente, temperatura e lartë.

Nga dita e katërt apo e pestë shfaqet ai rashi apo ai pikëzimi në lëkurë që është nga koka deri te këmbët dhe i gjithë trupi pikëzohet në këtë lloj mënyre. Në 4-5 ditët e para nuk dallohet dhe diagnoza diferenciale apo të dyshosh që ke Fruth duhet të dali Rashi me shenjat në lëkurë”, tha Tomini.

LEXONI GJITHASHTU:

• OBSH raporton për rritje të rasteve me fruth në Europë
• Mjeku jep alarmin: Ulet vaksinimi për fruthin në Shqipëri, më pak se 90% e kanë bërë