Fushata e 10-të elektorale, Kryeministri Rama në Euronews: Ja çfarë ka ndryshuar

Ndërkohë që jemi 7 ditë para zgjedhjeve, Kryeministri Edi Rama ishte këtë të diel i ftuar në “Review” në Euronews Albania për të folur rreth fushatës elektorale, por edhe rreth planeve të Partisë Socialiste për vazhdimin e qeverisjes në rast se në 11 maj dalin me fitore.

Rama tha se kjo është fushata e 10 elektorale e tij, “ndërsa shtoi se kjo është simfonia ë 9 dhe është nota 10, pasi njërën nuk e fituam në 2009”.

I pyetur se çfarë ka ndryshuar në 10 fushata ai tha:

“Ka ndryshuar Shqipëria, ka ndryshuar publiku, natyrisht ka ndryshuar shumë gjithë procesi i fushatës, përgatitjes. Është shumë më e thjeshtë por edhe më e sofistikuar në të njëjtën kohë. Ti ke më shumë eksperiencë dhe di shumë më mirë të planifikosh lëvizjet e të tjerëve, e të tuat. Është më qytetare mendoj. Gjithashtu ka ndryshuar edhe media, por për keq jo për mirë. Në sensin që është shumë më pak e lidhur me të tërën dhe shumë më e fokusuar te vetja. Kështu më duket mua”,-tha Rama.