Fushata e PD-së, Berisha: Do të rikthejmë projektin e ëndrrave për të rinjtë

Kreu i PD, Sali Berisha, në fjalën që po mban para pjesëmarrësve në sheshin “Nënë Tereza” ku hapi zyrtarisht fushatën elektorale, tha se me 11 Maj do të ketë një vështrim të ri për Shqipërinë.

Sipas Berishës, në këto 12 vite nuk ka pasur arritje madhore në fushën e lirisë. Ai shprehet i bindur se do rikthejë Shqipërinë në një projekt endrrash për të rinjtë.

“Këto vite, e keqja e vuri para vendin tonë. Këto vite, 12 vite ishin për Shqipërinë vite të shkretimit të saj nga bijtë dhe bijat, ishin vitet e varfërimit të saj, ishin vite në të cilat regjimi i narkosve të Tiranës dhe mafia ndërkombëtare bëri gjithçka që të fshijë nga kujtesa e këtij kombi veprën tuaj të pavdekshme, Shqipërinë pluraliste.

Bëri gjithçka të fshijë nga historia e këtij kombi arritjet madhore në fushën e lirisë. Po ja ku jemi sot, me flamurin tonë më krenar se kurrë me ju. Ja ku jemi sot, të bashkuar si asnjëherë. Ja ku jemi sot, të ngritur si Feniksi nga hiri në zenit për të shkuar drejt fitores.

Miqtë e mi, ne mblidhemi sonte me një vështrim të ri për Shqipërinë. Me një betim solemn para saj për ta nxjerrë ata nga kthetrat e këtij regjimi.

Për ta rikthyer atë, për të rikthyer tek ajo projektin e ëndrrave të të rinjve të saj, djemve dhe vajzave, ëndrrave më të bukura”, tha Berisha.

LEXONI GJITHASHTU:

• Berisha në hapjen e fushatës: Rama do ta ketë të vështirë natën sonte
• “Votoni doktor Berishën”, La Civita: Rama nuk ka çfarë thotë për 12 vjet dështim