Gjendet në Portin e Durrësit 11-vjeçari i humbur ditën e djeshme në Tiranë

Një 11-vjeçar, i zhdukur që nga dita e djeshme në zonën e Freskut në Tiranë, është gjetur këtë të martë në portin e Durrësit. Lajmi është konfirmuar për Euronews nga mamaja e djalit e cila thotë se është njoftuar nga vëllai i saj për gjetjen e të miturit.

“Më merr një grua në telefon dhe më thotë se djali im është parë në portin e Durrësit. Vëllai im shkoi menjëherë atje me policinë dhe e gjetën. Djali i tha asaj gruas se donte të shkonte në Kosovë, por ajo i tha: “Jo, do rrish këtu me ne.” Djali filloi të qante. Unë i pata thënë djalit se do ta dënoja për gabimin e bërë para disa ditësh, dhe se nuk do t’i jepja para për bukë, sepse kishte pirë një cigare në shkollë me një nxënës tjetër”, tha në dëshminë e saj pë Euronews, nëna e të miturit.

Kujtojmë që i mituri u pa për herë të fundit ditën e djeshme pranë shkollës “Androkli Kostallari” dhe, sipas informacionit paraprak, nuk është paraqitur në orët e mësimit. Mamaja e tij bëri denoncim në Komisariati Nr. 1 Tiranë, ndërsa fotoja e djalit iu dorëzua policisë për identifikim.