Gjendet piktura e Pollock, rikuperimi i veprës gjatë një aksioni të policisë

Një pikturë e panjohur më parë e artistit të famshëm amerikan Jackson Pollock është zbuluar në Bullgari nga policia, që po hetonte një rrjet ndërkombëtar trafikantësh të veprave të artit.

Sipas njoftimeve të autoriteteve lokale, persona të shumtë, shumica e të cilëve shtetas bullgarë, u arrestuan në kuadër të operacionit ndërkombëtar.

Në një komunikim me mediat, autoritetet nuk dhanë një përshkrim të pikturës, por bënë të ditur disa detaje të tjera të saj, përfshirë faktin se vlen rreth 50 milionë euro.

“Piktura e artistit Pollock u është dorëzuar ekspertëve të Galerisë Kombëtare të Artit në Bullgari. Prapa saj ka një dedikim kushtuar aktores amerikane Lauren Bacall, që duket se është shkruar nga vetë Pollock”, tha Desislava Petrova, prokurore në Bullgari.

Zyrtarja e lartë shtoi se për momentin nuk ka prova që piktura të ketë qenë pjesë e koleksionit të diktatorit rumun, Nikolae Çaushesku. Edhe ministri rumun i Kulturës e mohoi një gjë të tillë.

“Nga bisedimet që pata me Muzeun Kombëtar të Historisë dhe atë të Arteve arrita në përfundimin se pikturat e Çausheskut nuk kishin shkrime të tilla nga mbrapa dhe se një pikturë e Jackson Pollack nuk ka qenë kurrë e inventarizuar. Ndaj e kam të vështirë të besoj se këtu ka dorë Çaushesku”,  u shpreh Lucian Romascanu, ministër i Kulturës në Rumani.

Pollock, një figurë e spikatur e zhanrit abstrakt-impresionist në vitet 1940-1950, ishte i njohur për teknikën e tij të derdhjes së bojës dhe përdorimin e pikave të saj. Ai ndërroi jetë në vitin 1956.

LEXONI GJITHASHTU:

• Mendohej si e pavlerë, zbulohet se i përkiste të madhit Rembrandt 
• Çifti i të rinjve zbulojnë pikturat 400-vjeçare teksa rinovonin shtëpinë