Gjermania mposht Luksemburgun dhe merr kreun e grupit, Depay shpëton Holandën

E nisi në mënyrën e gabuar, por më pas ia doli të përmbysë gjithçka dhe të marrë kreun e grupit por Gjermania po bën detyrën ndaj çdo kundërshtari, ku i fundit ishte Luksemburgu.

Panzerat zhvilluan një paraqitje të kënaqshme, ku ndryshe nga sa jemi mësuar, shënuan vetëm dy herë në portën e kundërshtarit.

Heroi i gjermanëve ishte Nick Woltemade, i cili realizoi dopietë në fraksionin e dytë ndërsa katër herë kampionët e botës shpërdoruan disa mundësi të mira shënimi.

Në të njëjtin grup, Sllovakia bëri detyrën ndaj Irlandës së Veriut, të cilën e mposhti me rezultat minimal.

Sllovakia ka 12 pikë dhe renditet e dyta, po aq sa Gjermania kryesuese, ndërsa ndeshjen e fundit përballen së bashku.

Në grupin L, Kroacia blindoi vendin e parë dhe numëron 19 pikë, teksa të premten mori fitoren e radhës ndaj Ishujve Faroe me golat e Gvardiol, Musa dhe Vlasic ndërsa në vendin e dytë qëndron Çekia me 13 pikë.

Memphis Depay shmangu humbjen e Holandës në transfertën me Poloninë, përballje e cila mund të kishte përfunduar më keq për tulipanët, të cilët u ndëshkuan në minutën e 43’, kur Kaminski kaloi përpara të tijët.

Me nisjen të pjesës së dytë, Depay riktheu barazpeshën, por Holanda nuk mundi të përmbyste rezultatin, edhe pse krijoi shanset e saj.

Në ndeshjen e fundit të grupit, Polonia udhëton drejt Maltës, ndërsa Holanda pret Lituaninë.