Gjermania shpartallon Sllovakinë 6-0, siguron kualifikimin në Botëror

Gjermania është skuadra e radhës që ka siguruar kualifikimin në Kupën e Botës që luhet vitin e ardhshëm.

Të hënën, “Panzerat” mposhtën Sllovakinë me rezultatin e thellë 6-0 dhe mbyllën rrugëtimin në vendin e parë të grupit, duke treguar se janë ende një forcë e madhe dhe me ambicie për trofeun botëror.

Gjermania e nisi furishëm takimin, duke shënuar katër herë në portën e Sllovakisë në 45 minutat e para.

Shënues në pjesën e parë ishin Sane me një dopietë, Gnabry dhe Woltman. Në fraksionin e dytë, golat u realizuan nga Baku dhe Ouedraogo, që vulosën triumfin 6-0.

Me këtë fitore, Gjermania mbylli grupin në vendin e parë me 15 pikë, ndërsa Sllovakia, me 12 pikë, do të luajë në play-off.

Në sfidat e tjera kualifikuese, fitore morën Holanda, Kroacia, Polonia, Çekia dhe Irlanda e Veriut.

Tulipanët e Holandës shënuan katër gola ndaj Lituanisë dhe u kualifikuan si të parët në grup me 20 pikë, tre më shumë se Polonia që mbylli e dyta.

Në grupin L, Kroacia përmbysi Malin e Zi në transfertë, duke fituar 3-2. Osmajic dhe Krstovic kaluan përpara Malin e Zi, por golat e Perisic, Jakic dhe Vlasic i dhanë fitoren kroatëve.

Me 22 pikë në 8 ndeshje, Kroacia e Luka Modric mbylli grupin në vend të parë dhe siguroi kualifikimin direkt për në Kupën e Botës.