Gjinekologu: Sot fëmija mund të porositet, zgjidhet nëna surrogate

Mjeku gjinekolog Rustem Celami thotë se në ditët e sotme fëmija mund të porositet duke zgjedhur nënën surrogate, e cila do ta mbajë për 9 muaj, teksa gjenet do të jenë të prindërve të fëmijës.

Në emisionin “Good Morning Albanians” në Euronews Albania, Celami u shpreh se kjo është e lejuar në shumë vende të botës.

“Unë nuk mund të them a do abuzohet teknikisht. Normalisht do ketë diferenca dhe me shkencat. Eksperimentet apo provat e kanë të pamundur që të jenë në rigorozitet absolut, megjithëse ka rregulla strikte. Janë faktorët, përveçse është faktori që duam ne, ne sot jemi në teknologjinë 5G. Dhe në realitetin e sotëm zgjedh shumë gjëra.

Sot mund të zgjedhim, ne kemi surrogacinë, nënën që, si të thuash merret me qira, paguhet për të mbajtur foshnjen për 9 muaj, është me kontratë ligjore. Po merr ushqimin prej asaj nëne. Gjenet janë të çiftit që e porosit. Fëmija sot porositet. Shumë vende të botës e kanë të lejuar surrogacinë. Kemi Greqinë që e ka lejuar me ligj; ka edhe vende të tjera që e kanë lejuar”, theksoi ai.

Studiuesi dhe shkencëtari Hashem Al–Ghaili ka njoftuar se së shpejti do të kemi edhe bebe artificiale dhe këtë gjë do ta mundësojë laboratori Ectolife. Bioteknologu në Gjermani po zhvillon strukturën e parë të mitrës artificiale në botë dhe kjo ju lejon të zgjidhni karakteristikat e foshnjës nga një menu.

Laboratori EctoLife dhe të jetë në gjendje të rrisë 30,000 foshnja në vit dhe thuhet se bazohet në mbi pesëdhjetë vjet kërkime shkencore novatore.