Gjirokastër, aerodromi turistiko-sportiv tërheq turistët nga Italia dhe Greqia

Aerodromi turistiko-sportiv i Gjirokastrës  është kthyer në një pikë tërheqëse për turistët që mbërijnë me avionë të vegjël dhe dëshirojnë të vizitojnë Shqipërinë. Përgjatë këtij viti të apasionuarit e avioturizmit kanë fluturuar nga Italia dhe Greqia për të vizituar Jugun e vendit. Tashmë ky aerodrom fushor është edhe qendër e organizimit të aktiviteteve për sportet e ajrit si fluturimet e lira, parashutizmi, etj.

Turisti grek shprehet se aerodromi është në një pozicion mjaft të mirë.

“Vij nga Greqia,është hera ime e parë që  fluturoj me avion në drejtim të Gjirokastrës, mendoj se është diçka e bukur, ky aerodrom fushor është në një pozicion gjeografik mjaft të mirë dhe i përshtatshëm për avionët e vegjël. Mesa jam informuar edhe qyteti është tërheqës, uroj të jetë një vizitë e këndshme”, u shpreh ai.

Një tjetër turist u shpreh se ka vizituar shumë vende dhe se ky aerodrom është një mundësi e mirë për të parë Gjirokastrën.

“Më pëlqen turizmi i ajrit dhe kam vizituar shumë vende, është diçka e bukur të vizitosh me avion Gjirokastrën, shpresoj që të keni me shumë aerodrome të tilla duke ju dhënë mundësi sa më shumë turistëve të vizitojnë Shqipërinë”, tha turisti.

Zhvillimi i avioturizmit cilësohet si një mundësi e mirë për tërheqjen e vizitorëve në qytetin e gurtë. Aerodromi i Gjirokastrës ka një historik mbi një shekullor ndërkohë që rijetësimi i tij ndikon pozitivisht në nxitjen e turizmit.

LEXONI GJITHASHTU:

• Çelet ekspozita me makina retro “Të njohim Shqipërinë”, në shërbim të turizmit
• Ekoturizmi në Gjirokastër, qyteti ofron resurse të veçanta