Pragfestat e Krishtlindjeve dhe Vitit të Ri 2025 në Gjirokastër kanë krijuar një atmosferë të veçantë.

Komplekset muzealë, ndërtesat karakteristike dhe rrugët e kalldrëmta janë zbukuruar nga dekori dhe dritat shumëngjyrëshe.

Dekori i festave dhe peizazhi arkitektonik e bëjnë qytetin e gurtë tërheqës për turistët edhe në stinën e dimrit.

“Gjirokastra është shndërruar në një atraksion turistik, është bërë një trend turistik falë shumë aktorëve dhe faktorëve, jo vetëm pjesës infrastrukturore, shtimit të kapaciteteve por edhe promovimit të madh që i është bërë dhe kënaqësisë që ndjejnë turistët që vijnë për përshtypjet që ata lënë”, Maksim Hoxha, kryetar i Dhomës së Tregtisë Gjirokastër.

Në nisje të muajit dhjetor konstatohet një interes në rritje i turistëve, kryesisht të huaj për të vizituar Gjirokastrën. Bizneset hoteliere dhe strukturat akomoduese kanë rritur prenotimet për ditët e festave të fundvitit.

“Ky trend shpresoj që për këtë vit për muajin dhjetor, për muajin e festave ka rezervime dhe për festat e Krishtlindjeve dhe për festën e Vitit të Ri, nga turoperator kryesisht të huaj, vitet e kaluara ka qenë e pakët ndërsa këtë vit e shikojmë më të kënaqshme”, shprehet ai.

Përgjatë këtij viti Gjirokastra është vizituar nga rreth 600 mijë turistë, pjesa më e madhe e të cilëve janë turistë të huaj.

LEXONI GJITHASHTU:

• 120 raste në ditë më grip në Gjirokastër, shtohen rastet tek të moshuarit
• Ardhja e dimrit, banorët e Gjirokastrës apelohen për kujdes ndaj zjarreve në banesa