GJKKO jep masën e sigurisë për Fredi Belerin

GJKKO ka caktuar masën e sigurisë “Arrest me burg” për Fredi Belerin dhe bashkëpunëtorin e tij Pandeli Kokaveshi.

Gjyqtarja Atalanta Zeqiri në vendimin e marrë në Dhomë Këshillimi vendosi të pranonte kërkesën e Prokurorisë së Posaçme, që Fredi Beleri të gjykohet në burg për akuzën e blerjes së votave.

Në përfundim të seancës avokati i Belerit e cilësoi vendimin si të pa bazuar në prova, pasi sipas tij Beleri nuk ka pasur asnjë kontakt me të infiltruarin e policisë.

Beleri do të vijojë të mbahet në ambientet e paraburgimit në Tiranë, ndërkohë që në pikëpyetje mbetet nëse ai do të mund ta marrë mandatin si kryebashkiak i zgjedhur i Himarës.

Beleri së bashku me anëtarin e shtabit të tij elektoral, Pandeli Kokaveshi, i cili nuk ishte i pranishëm në seancë pasi ndodhet në spital për shkak të gjendjes shëndetësore, akuzohen për shit-blerje votash.

Në fletën e arrestit të lëshuar ndaj Belerit theksohet se ai u ndalua në flagrancë duke blerë vota, ndërkohë që në dosjen e prokurorisë thuhet se blerja e votave është kryer nga Kokaveshi në ambientet e tualetit të një lokali në mesditë dhe jo në momentin e arrestimit. Votat sipas policisë iu blenë të infiltruarit të grupit hetimor.

LEXONI GJITHASHTU:

• “S’është takuar kurrë me të infiltruarin”, avokati i Belerit: Do ankimojmë vendimin
• Qafoku: Rama ishte i papërgatitur për arrestimin e Belerit, i dëmtonte imazhin