Gjobat në kufirin grek, Rama: Do të rimbursojmë pagesën

Kryeministri, Edi Rama njofton se qeveria shqiptare do të rimbursojë të gjithë ata persona që janë gjobitur nga autoritet grek për shkeljen e afateve të qëndrimit të përkohshëm.

Kreu i qeverisë thotë se, pavarësisht se kishin marrë zotimin nga homologu i tij grek, Kyriakos Mitsotakis, është vërejtur se një numër caktuar qytetarësh janë gjobitur.

“Si rezultat i mirëkuptimit të qeverisë greke dhe angazhimit personal të kryeministrit Mitzotakis, shqiptarët me leje të përkohshme qëndrimi nuk u penalizuan masivisht për shkeljen e pavullnetshme të afateve. Por sidoqoftë është verifikuar një numër i kufizuar rastesh kur janë vendosur gjoba dhe siç jam zotuar ato do të rimbursohen nga shteti shqiptar. Ne themi atë që bëjmë dhe bëjmë atë që themi”, shkruan Rama.

Të gjithë qytetarët që disponojnë dokumentin e pagesës së gjobës së autoriteteve greke për shkak të kalimit të afatit të qëndrimit në Greqi, mund të aplikojnë për rimbursimin në Drejtorinë e Përgjithshme të Tatimeve.