Gjykata Kushtetuese miraton marrëveshjen e emigrantëve me Italinë

Gjykata Kushtetuese ka miratuar marrëveshjen e arritur mes qeverisë shqiptare dhe asaj italiane në lidhje me emigrantët.

Burime për Euronews Albania bëjnë me dije se marrëveshja është miratuar nga ana e Kushtetueses.

Kryetarja e Gjykatës Kushtetsues, Holta Zaçaj, mbajti një konferencë me gazetarët, ku dhe komunikoi arsyet ligjore të kalimit të marrëveshjes.

Diferenca ka qenë shumë e ngushtë me 1 votë, ku nga 9 anëtarë të Gjykatës Kushtetuese kanë votuar pro marrëveshjes 5 prej tyre.

Ky vendim i hap rrugë ratifikimit në parlament të marrëveshjes, ku më pas do të kemi dhe ngritjen e dy qendrave të pritjes së emigrantëve në Shëngjin.

Në 13 dhjetor, Gjykata Kushtetuese mori në shqyrtim kërkesën e bërë nga 30 deputetë të grupit Berisha-Bardhi lidhur me marrëveshjen Itali-Shqipëri, e cila konsiderohej nga ata anti-kushtetuese.

Marrja në shqyrtim e kërkesës nga Gjykata Kushtetuese, solli automatikisht pezullimin e ratifikimit të marrëveshjes në Kuvend, gjë që ishte planifikuar të bëhen në seancën plenare të 14 dhjetorit.

Kryeministri, Edi Rama nuk preferoi të jepte komente, duke thënë se një gjë e tillë është në të drejtën e Gjykatës Kushtetuese.

Drafti për marrëveshjen për emigrantët, u miratua në Qeverinë italiane në 5 dhjetor dhe u dërgua në parlamentin italian për miratim. Më 6 nëntor 2023 kryeministri Edi Rama dhe kryeministrja italiane Giorgia Meloni nënshkruan në Romë marrëveshjen për ndërtimin në Shqipëri të dy qendrave për strehimin e emigrantëve.

Sipas marrëveshjes porti i zbarkimit do të jetë Shëngjini, ndërsa Gjadri do të jetë kampi ku do të ndërtohet vendqëndrimi i tyre. Kapaciteti maksimal pritës është 3 mijë shtretër.

LEXONI GJITHASHTU:

• Dhoma e Deputetëve në Itali miraton marrëveshjen me Shqipërinë për emigrantët
• Marrëveshja për emigrantët/Rama: S’do e pranonim kërkesën nëse s’do ishte nga Italia