Gjyqtarët kërkuan rritje rrogash, reagon Rama: Duan të marrin 9230 euro në muaj

Kryeministri Edi Rama ka reaguar sërish ndaj kërkesës së shoqatës së gjyqtarëve për rritje të pagave.

Përmes një postimi në X, Rama i cilëson absurde kërkesat e gjyqtarëve që sipas tij kanë rrogat më të larta në hierarkinë e pagave në shtet.

Rama solli në vëmendje edhe përplasjen me GJKKO lidhur me pezullimin nga detyra të zv.kryeministres Belinda Balluku, duke “marrë kompetencat e kryeministrit, Presidentit e parlamentit bashkë pa marrë asnjë votë”.

Reagimi i plotë i Ramës në X

“S’ka mundësi”, më shkruajnë disa, lidhur me kërkesën e gjyqtarëve për ta rritur pagën me 1600 Euro mbi aktualen! Jo vetëm që ka mundësi, po 1600 Euro është rritja që kërkojnë magjistratët e këshilltarët e zakonshëm, se mes rritjekërkuesve janë edhe specialët, pra ata të GJKKO dhe SPAK-ut, të cilët kanë pagat më të larta në republikë, por kërkojnë edhe një rritje prej 3100 Eurosh! Po, asnjë shaka, detin ku aktualisht marrin 6130 Euro në muaj, tani duan që t’ua kthejë në kos Gjykata Kushtetuese me 3100 Euro plus, e si përfundim të marrin 9230 Euro në muaj. Si ka mundësi?! Ka mundësi si jo, kur arrin të ndryshosh edhe qeverinë me një vendim gjykate, duke marrë kompetencat e kryeministrit, Presidentit e parlamentit bashkë, pa pasur marrë një kokërr vote të vetme nga populli tërë jetën tënde, si nuk arrike të marrësh nga arka e shtetit me një vendim tjetër gjykate, mijëra euro për të rritur pagën tënde?! Kush ka mbetur pa e kuptuar që s’e kam hallin tek një ministër unë, po tek rreziku real i përmbysjes së balancës demokratike mes pushteteve?!

LEXONI GJITHASHTU:

• Rama: Përse nuk reagojnë gjyqtarët për ata që shajnë me libër shtëpie?
• Rama: Zjarret verore sfidë e madhe, rrisim financimet dhe kapacitetet për pyllëzim