Grafiti serb për Kosovën shfaqet në Bosnjë Hercegovinë

Grafiti “Kur ushtria të kthehet në Kosovë”, është shfaqur më 2 gusht në Banja Llukë të Bosnje-Hercegovinës, afër rrugës kryesore që të çon në Prijedor, qytet ku janë kryer disa prej krimeve më të rënda gjatë luftës kundër banorëve joserbë.

Grafiti i njëjtë është parë paraprakisht në disa qytete në Serbi, shkruan REL

Ai është krijuar nga tifozët e klubit të futbollit Crvena Zvezda, pas një ndeshjeje miqësore me klubin italian Fiorentina më 26 korrik në Beograd.

Mesazhi i grafitit është pjesë e një kënge popullore të kënduar nga mitropoliti Amfilohije i Kishës Ortodokse Serbe dhe peshkopi Atanasije.

Në shkurt, aktivistët e organizatës Iniciativa e të Rinjve për të Drejta të Njeriut dhe Asociacioni Krokodili, e kanë ngjyrosur me të kuqe këtë grafit në Sheshin Slavija të Beogradit.

Mirëpo, ai është rikrijuar në atë vend, dhe disa vende tjera në Beograd.

Prej fundit të vitit 2021, kryeqyteti i Serbisë është vërshuar nga grafite të Ratko Mlladiqit, të dënuarit nga Haga për krime lufte në Bosnje-Hercegovinë.

LEXONI GJITHASHTU:

• Kosovë, sigurimi i bazës ligjore për mbajtjen e zgjedhjeve të reja në veri
• Kur Greqia mund ta njohë Kosovën? Historiani: Gjithçka varet nga dialogu me Serbinë