Grip apo COVID? 1250 vizita në 10 ditë në Fier, moshat më të rrezikuara

1250 vizita janë shënuar në 10 ditëshin e parë të janarit pranë urgjencës së spitalit rajonal Fier. Këto raste i dedikohen virozave të stinës, kryesisht gripit sezonal. Fluksi më i madh është shënuar në ditët e para të vitit te ri, kjo pasi pjesë e vizitave kanë qenë edhe emigrantët, kur numri i vizitave ditore arriti në 150 në 24 orë.

“Situata me virozat paraqitet e renduar. Kemi pasur shume raste që paraqiten gjatë 24 orëshit duke shkuar ne 150 në 24 orë. Aktualisht qe po flasim janë rreth 1250 vizita për 10 ditëshin e parë të muajit janar. Pjesa më e madhe e këtyre vizitave predominojnë temperatura, kolla, dhimbje koke, muskujsh, dhimbje trupi, shenjat kryesore që paraqiten në urgjencë”, thotë kreu i urgjencës së Fierit Blendi Dhespollari.

Ndërkohë, Dhespollari ka kërkuar shmangien e paraqitjes në urgjencë të rasteve me simptoma të lehta të cilat mund të trajtohen edhe pranë mjekut të familjes.

Përsa i përket frikës së përhapjes së COVID, mjeku sqaron se pjesa më e madhe e pacienteve janë të prekur nga virozat sezonale.

“Më shume kemi të bëjmë me grip sezonal, për këtë kemi bërë edhe teste për të kuptuar nëse kemi të bëjmë me grip apo nënvariante të COVID 19. Kështu që kemi të bëjmë më shumë me grip sezonal”, shprehet ai.

Në kushtet kur virozat dhe gripi sezonal janë në pikun e tyre, mjekët kërkojnë marrjen e masave parandaluese por edhe lehtësuese si shmangien e mjediseve të mbipopulluara, përdorimin e lëngjeve, ushqim të shëndetshëm si dhe shmangien e kontakteve me personat e prekur nga virozat.

LEXONI GJITHASHTU:

• Rriten rastet me grip, Tomini: 13 mijë në javë me viroza dhe grip, më pak COVID
• Pensionistja: Jam kockë e fortë, kam bërë 3 vaksina, s’më kap gripi