“Gruaja më vdiq në aksident, vet rashë 6 muaj në koma”, rrëfimi prekës i 70-vjeçarit

Personazhi i kësaj të shtunë në emisionin “Real People” me gazetarin Flori Gjini ishte Fadil Daja, një 70-vjeçar që ndau historinë e tij emocionuese dhe të vështirë.

Ai rrëfeu sfidat e jetës së tij, duke filluar nga fëmijëria e tij e trishtuar dhe ngjarjet fatkeqe që e shoqëruan.

Fadil Daja tregoi se në vitin 2006, ai dhe bashkëshortja e tij, Majlinda bëhen prindër për herë të parë me djalin e tyre, Olsin.

Mirëpo fatkeqësisht, ai humbi gruan e tij në një aksident tragjik me makinë, ndërsa vetë qëndroi për 6 muaj në koma.

“Ne punonim në një lokal, pronari martoi vajzën dhe na ftoi. Gruaja ime, Majlinda, vdiq në një aksident, unë isha në makinë me të dhe rashë në koma për 6 muaj. Pas 6 muajsh, kur mora vesh çdo gjë, nuk e prisja që ajo të ndahej nga jeta. Djalin e kishim lënë në shtëpi atë natë; Olsi ishte vetëm 6 vjeç. Kur ai pyeste për mamanë, ne i tregonim që ajo ishte në qiell. Kur ndodhi aksidenti, u hodha vetë nga makina. E kam si një jetë të dytë këtë. Pasi u zgjova nga koma, takova për herë të parë vjehrrin tim në spital, që nuk e priste që unë të zgjohesha. Më vendosën një muzikë të lehtë për të parë reagimin e trurit tim dhe ai reagoi. Djalin nuk e sillnin në spital. Djalin e takova pas 8 muajsh. Vjehrri më tha për Majlindën. Policia erdhi më mori në pyetje. Mua më bëri të fortë vështirsia imë në jetë,” –tha 70-vjeçari.