Hamasi: Nuk ka ende një datë për të rifilluar negociatat me Izraelin

Hamasi thotë se nuk ka ende një datë që negociatorët e tyre të kthehen në Kajro për të rifilluar bisedimet për arritjen e një armëpushimi në këmbim të lirimit të pengjeve.

Anëtari i byrosë politike të Hamasit, Hossam Badran tha për CNN se “nuk ka asgjë të re”, duke shtuar se kryeministri izraelit Benjamin Netanyahu refuzon t’i përgjigjet kërkesave të drejta palestineze në lidhje me nevojat themelore të Gazës.

Ai renditi “ndalimin e vrasjeve, tërheqjen, ofrimin e ndihmës dhe kthimin e njerëzve të zhvendosur pa kushte” si faktorë që duhen marrë parasysh. Delegacioni i Hamasit u largua nga Kajro më 7 mars pas ditëve të bisedimeve pa një përparim të dukshëm.

Negociatorët kishin shpresuar të kishin një projekt-marrëveshje këtë javë pas takimeve në Kajro, por nuk ndodhi kështu.

Izraeli ka paralajmëruar se nëse pengjet izraelite që mbahen në Gaza nuk janë në shtëpi deri në Ramazan, ata do të nisin një ofensivë ushtarake në Rafah në Gazën jugore, ku rreth 1.5 milionë palestinezë po përpiqen të kërkojnë siguri nga luftimet.

LEXONI GJITHASHTU: 

• Nga Parisi në Gramsh, kapitujt e jetës së Edmond Tupes… | PROFIL
• Shkurtohet kohëzgjatja e procesit për azil në Gjermani