Himarë| Goditi me thikë kolegun e punës, shpallet në kërkim 27 vjeçari

Një 27 vjeçar është shpallur në kërkim nga policia e Himarës, pasi dyshohet se ka goditur me thikë kolegun e tij të punës.

Shtetasi E.Sh, banues në Tiranë e goditi 29 vjeçarin, me iniciale A.M në orët e para të mëngjesit të kësaj të shtune në ambjentet e një fast-food-i në Dhërmi.

Sipas njoftimit të policisë, thuhet se konflikti ka ndodhur për motive të dobëta dhe i plagosuri ndodhet jashtë rrezikut për jetën.

Grupi  hetimor ndodhet në vendngjarje dhe po punon për kapjen e autorit dhe zbardhjen e plotë të ngjarjes, ndërkohë që materialet i kanë kaluar Prokurorisë për veprime të mëtejshme.

Njoftimi i Policisë:

Komisariati i Policisë Himarë ka referuar materialet në Prokurori dhe po punohet për kapjen e shtetasit E. Sh., 27 vjeç, banues në Tiranë, pasi në orët e para të mëngjesit, në ambientet e një fast-foodi në Dhërmi, ku ky shtetas ishte i punësuar, dyshohet se gjatë një konflikti për motive të dobëta, ka plagosur me mjet prerës (thikë) kolegun e tij të punës, shtetasin A. M., 29 vjeç, i cili është jashtë rrezikut për jetën.