Horner kritikon Wolff për Verstappen

Toto Wolff nuk e fsheh se të gjithë po presin vendimin e Max Verstappen për të ardhmen në Formula 1. Por Christian Horner i përgjigjet rivalit të tij se është mirë të mendojë për skuadrën se sa merkaton e pilotëve.

Tre herë kampioni në fuqi, Verstappen, ka një kontratë me Red Bull deri në vitin 2028 por Wolff është i interesuar ta marrë më herët njeriun që humbi rreth një dekadë më parë – pasi po planifikon të ardhmen pa 7 herë kampionin e transferuar te Ferrari, Lewis Hamilton.

Pas përfundimit të “Chinese Grand Prix”, Wolff tha se nuk mjafton vetëm makina e shpejtë për të qëndruar në një skuadër, por edhe njerëzit që të rrethojnë duhet të jenë suportues pa asnjë mëdyshje. Gjithashtu austriaku mendon se Max që e njeh motorsportin më mirë se kushdo tjetër do të marrë vendimet më të mira për të.

Nga ana e tij, Verstappen konfirmon se ai dëshiron të ketë një ambient të qetë për zhvillimin e makinës dhe karrierës. Në krah të holandezit del Christian Horner që nuk e fsheh bezdinë kur e pyesin për pilotin dhe të ardhmen e tij. Madje ai thotë se Verstappen nuk ka asnjë arësye të lërë skuadrën që po kalon formën më të mirë.

Mercedes është konstruktori i 3’të këtë sezon, madje edhe pas klientëve të tij e për këtë arësye ata duhet të mendojnë më shumë për makinën se sa për pilotët e të tjerëve, këshillon Horner.

LEXONI GJITHASHTU:

• Mercedes fiton më shumë se kushdo në Formula 1
• FIA dhe Formula 1 shpallin kalendarin për vitin 2025