Ministria e Jashtme ka deklaruar që konsulli shqiptar në Ukrainë ndodhet në Tiranë dhe nuk është kthyer në Ukrainë për arsye sigurie.
Adhurim Resuli, që është i dërguari i Shqipërisë në Ukrainë, po e ndjek situatën nga Tirana. Ky lajm u bë i ditur në emisionin SOT në Euronews Albania.
Dy ditë më parë Ministria për Evropën dhe Punët e Jashtme e Shqipërisë u ka bërë thirrje shtetasve shqiptarë që të largohen nga Ukraina sa më parë.
Në njoftimin e bërë të shtunën (12 shkurt), Ministria ka këshilluar po ashtu të mos udhëtohet drejt Ukrainës ku ekziston rreziku për luftë. Ndërkohë, nuk janë dhënë detaje se sa është numri i shtetasve shqiptarë në Ukrainë.
Deri më tani vendet si Shtetet e Bashkuara të Amerikës, Mbretëria e Bashkuar, Gjermani, Estonia, Suedia, Norvegjia e Holanda, u kanë bërë thirrje shtetasve të tyre të largohen nga Ukraina.
Në rajonin e Ballkanit, Mali i Zi dhe Maqedonia e Veriut u kanë bërë thirrje qytetarëve të vet që përkohësisht të lëshojnë Ukrainën po ashtu.
Më herët, të shtunën, u bë e ditur se Shtetet e Bashkuara do të evakuojnë Ambasadën e tyre në Kiev pasi zyrtarët e inteligjencës amerikane paralajmërojnë se një pushtim rus i Ukrainës është gjithnjë e më i afërt.
Masa e re vjen pasi Uashingtoni ka përshkallëzuar paralajmërimet për një pushtim të mundshëm rus të Ukrainës, duke thënë se mund të ndodhë në çdo moment.
Një operacion i madh ushtarak kundër Ukrainës mund të fillojë “çdo ditë tani”, madje edhe para përfundimit të Lojërave Olimpike Dimërore, tha më 11 shkurt këshilltari për sigurinë kombëtare i Shtëpisë së Bardhë, Jake Sullivan.
Ai u bëri thirrje të gjithë amerikanëve që të largohen menjëherë nga Ukraina.
“Nëse qëndroni, po rrezikoni”, tha ai.
Rusia ka mohuar se grumbullimi prej më shumë se 100,000 ushtarësh dhe pajisjeve ushtarake në zonat afër kufirit me Ukrainën është paralajmërim për një pushtim të mundshëm.
LEXONI GJITHASHTU:
- Lecaj: Shqiptarët në Ukrainë janë të paorganizuar
- Shqipëria nuk ka rol për të ndryshuar situatën Rusi-Ukrainë, thotë Arta Dade
