I nderuar që Yuri Kim nuk më ftoi në festimet e djeshme, thotë Berisha

Kryetari i Partisë Demokratike, Sali Berisha nuk ishte i ftuar në festimet që u mbajtën për 100-vjetorin e marrëdhënieve Shqipëri-SHBA, por tha se ishte i nderuar që ambasadorja amerikane Yuri Kim nuk e ftoi.

Në një deklaratë për mediat nga selia blu, Berisha u shpreh se Kim me qendrimet e saj dhe mafia e George Soros, kanë dëmtuar perceptimin e shqiptarëve për Shtetet e Bashkuara.

“Zonja Kim, duke mos më ftuar më nderoi. Kjo për faktin se ajo me qëndrimet e saj, ka dëmtuar më shumë bashkë me Edi Ramën dhe mafien e George Soros, perceptimin dhe imazhin e shkëlqyer që kanë pasur shqiptarët për Shtetet e Bashkuara të Amerikës.

U ndjeva i privilegjuar që unë nderova ngjarjen midis mirditorëve, ndër shqiptarët më tradicionalë të të gjitha trojeve. Shpreh urimet më të mira për 100-vjetorin, për të cilin Partia Demokratike dhe Sali Berisha kanë kontributet më të pakrahasueshme historike”, theksoi Berisha.

Marrëdhëniet diplomatike Shqipëri-SHBA kanë nisur më 28 korrik 1922, pak muaj pas përfundimit të Konferencës së Paqes në Paris, ku presidenti amerikan Wilson doli në krah të shqiptarëve.

Këto marrëdhënie patën një ndërprerje prej 52 vitesh gjatë pushtimit italian dhe regjimit komunist për t’u rivendosur sërish më 15 mars 1991 me përmbysjen e regjimit dhe vendosjen e demokracisë.

LEXONI GJITHASHTU

• Berisha-Ramës: Do përballesh me revoltë nëse rrit çmimin e energjisë elektrike
• Berisha: Energjia elektrike po shndërrohet në shkop magjik i vjedhjeve nga Rama