I verbër që në lindje, 37-vjeçari nga RMV kërkon trajtim të veçantë, vuan nga tumori

Prej 37 vitesh vuan mungesën e shikimit, madje asnjëherë nuk ka shijuar dashurinë dhe përkujdesjen e prindërve, ndërsa sot përballet me vështirësi ekonomike për shkak të rritjes së kostos së jetesës.

Ky është Suaret Alishani, qytetar i Shkupit, i cili kërkon nga autoritetet përkatëse rritjen e asistencës sociale për personat me aftësi të kufizuara. Përpos mungesës së shikimit, 37-vjeçari është diagnostikuar me tumor në kokë.

“Paratë që marr nga asistenca nuk më mbulojnë shpenzimet minimale. Më duhet të paguaj qiranë, dritat, ujin dhe mbi të gjitha terapinë mjekësore, pasi vuaj nga tumori në kokë. Nevoja për medikamente është me e madhe, përpos pengesave që kam që nga lindja”, thotë Suaret Alishani.

Shpesh herë, Alishani ndihmohet nga të tjerët, por ai nuk dëshiron që trajtohet me lëmoshë.

“Fatkeqësia jonë është që kemi lindur në shtet me pengesa në zhvillim, dhe politikanë me nevoja të veçanta. Besoj se ata do e kuptojnë mesazhin dhe do na e pranojnë kërkesën për trajtim të veçantë”, shprehet ai.

Personat me aftësi të kufizuara prej më shumë se 1 viti kërkojnë kushte dhe trajtim dinjitoz. Në rast të mos plotësimit të tyre, ata kërcënojnë se do ngrenë tenda përballë parlamentit në shenjë proteste.

Ministria e Punëve Sociale të Maqedonisë së Veriut deri më tani, personave me pengesa u ka premtuar 15 për qind rritje të kompensimeve mujore, mirëpo edhe këtë përqindje të rritjes deri më tani nuk e ka realizuar.

LEXONI GJITHASHTU:

• Historia e aktorit 21-vjeçar që do të thyejë paragjykimet
• 5 mësime jete nga 5 filozofë të lashtë grekë