Ibrahimaj: Pa Bordin e Transparencës, do e paguanim naftën më shtrenjtë

Ministrja e Financave dhe Ekonomisë, Delina Ibrahimaj deklaroi se ngritja e Bordit të Transparencës ka bërë të mundur uljen e çmimit të karburantit.

Gjatë fjalës së saj këtë të enjte në Kuvend, Ibrahimaj u shpreh se marzhi i fitimit bruto është ulur dhe nëse nuk do të ishte ngritur bordi, çmimi i karburantit do të ishte më i lartë.

“Ju thoni që kemi krijuar disa borde të cilat janë fashiste, komuniste, të cilat kanë negativisht në çmimin e karburanteve. E keni gabim. Bordet kanë bërë të mundur që marzhi i fitimit bruto përfshirë kostot operacionle, këtë vit, që nga fillimi i miratimit të bordeve të jetë 5-6%.

Ndërkohë, që gjatë vitit të kaluar, ky marzh ka qenë 15-18%. Kjo do të thotë që nëse bordet nuk do të ishin ngritur, do të kishim çmime më të larta të karburantit se ato që kemi sot”, theksoi ministrja.

Ditën e djeshme, Bordi i Transparencës vendosi që një litër naftë të shitet me 249 lekë për litër.

Ndërsa, çmimi i benzinës me 242 lekë për litër dhe ai i gazit me 83.

LEXONI GJITHASHTU

• Ulet çmimi i naftës, 249 lekë për litër
• Çdo muaj në Shqipëri hyjnë rreth 10 mijë litra më pak naftë