Igli Hasani: Presim hetim serioz nga Serbia për sulmin në Banjskë

Ministri për Europën dhe Punët e Jashtme, Igli Hasani ka thënë në një konferencë për mediat se presin hetim nga Serbia për sulmin në Banjskë.

Qëndrimi i dialogut, sipas tij mbetet i pandryshuar, por grupi kriminal që shkaktoi vdekjen e një rreshteri në Veri duhet hetuar.

“Nuk ka asnjë ndryshim të qëndrimeve të ministrave të Jashtëm. Ka ndryshime në gjeopolitikë. Ka ndodhur një sulm kriminal. Qëndrimi ndaj dialogut mbetet i pandryshuar dhe është në harmoni të plotë me SHBA e BE. Kemi deklaruar disa herë se formati i dialogut duhet ngritur në nivelin e një konference dhe normalizimi me planin franko-gjerman si udhërrëfyes. Presim që Serbia të nisë një hetim serioz për grupin kriminal. Dialogu është rruga e vetme drejt paqes dhe duhet të punojmë me guxim drejt normalizimit të marrëdhënieve,” – u shpreh Hasani.

Rreshteri Afrim Bunjaku, i cili ishte pjesëtar i Policisë së Kosovës nga viti 2001, u vra mëngjesin e 24 shtatorit pas përplasjes me një grup të armatosur në Banjskë të Zveçanit në pjesën veriore të vendit të banuar me shumicë serbe.

Sulmuesit e armatosur, rreth 30 persona, ishin vendosur në manastirin e Banjskës, nga ku shkëmbyen të shtëna me organet e rendit.

Autoritetet konfiskuan edhe një sasi të madhe armatimi. Autoritetet e Kosovës bënë përgjegjës Serbinë për sulmin, ndërsa Beogradi zyrtar fajësoi serbët e Kosovës.

LEXONI GJITHASHTU:

• Ministeriali në Tiranë| Hasani: Të arrijmë diçka që të jetë e prekshme nga qytetarët
• Situata në Veri/ Balla e Hasani nisen drejt Kosovës, pjesë në homazhet për Bunjakun