Incidenti në Gramsh, Mediu: Rusia po kërkon vatra të reja konflikti

Kryetari i Partisë Republikane dhe deputeti, Fatmir Mediu thotë se Rusia po kërkon vatra të reja konflikti, duke iu referuar incidentit në uzinën ushtarake në Gramsh.

Në një intervistë për “Euronews Albania”, Mediu u shpreh se në pikëpamjen gjeopolitike, Rusia e konsideron Ballkanin si pjesë të vetën.

“Në pikëpamjen gjeopolitike, Rusia e konsideron Ballkanin si pjesë të vetën. Në pikëpamjet e zhvillimeve të fundit, sidomos pas agresionit rus, Rusia kërkon që të krijojë vatra konflikti. Për këtë, po përpiqet në mënyrë të qartë nëpërmjet Serbisë të krijojë situata konflikti. Nuk është hera e parë, edhe më parë ka tentuar të rekrutojë ushtarakë shqiptarë, por nuk ja ka arritur”, theksoi Mediu.

Ai bëri thirrje për mbledhjen sa më parë të Këshillit të Sigurisë Kombëtare.

Dy shtetas rusë, 33-vjeçarja Svetlana Timofoeva, 23-vjeçari Mikhail Zorin dhe një ukrainas janë arrestuar mbrëmjen e së shtunës pas një incidenti në uzinën ushtarake në Gramsh, ku plagosën dy ushtarë shqiptarë.

Në dëshminë e tyre, ata kanë thënë se janë blogerë dhe fotografonin kryesisht territore ushtarake që janë të braktisura dhe nuk përdoreshin më nga shteti.

LEXONI GJITHASHTU

• Ekskluzive | Automjeti luksoz që përdorën rusët për të hyrë në uzinën në Gramsh
• ‘Rama i konsideron spiunë’, mediat ruse për incidentin në uzinën në Gramsh
• Blogerë apo spiunë? Çfarë fotografuan rusët në Shqipëri