Infeksionet seksualisht të transmetueshme, doktoresha tregon si të merrni mostrën laboratorike për rezultate të sakta

Kamera e “Health O’Clock” vizitoi laboratorin e doktoreshë Silva Tafaj për të mësuar më shumë mbi analizat laboratorike për infeksionet seksualisht të transmetueshme (SST). Doktoresha theksoi rëndësinë e diagnostikimit korrekt dhe të hershëm për parandalimin dhe trajtimin e këtyre infeksioneve.

Doktoresha shpjegoi se saktësia e analizave varet shumë nga mënyra e marrjes së mostrës: “Për femrat, disa mostra duhen marrë nga cerviksi nga gjinekologu, ndërsa për infeksione të tjera mund të përdoret vetëm tampon vaginal ose urina e parë. Koha dhe mënyra e marrjes së mostrës ndikojnë direkt në rezultatin e analizës.” Ajo shtoi gjithashtu se përdorimi i antibiotikëve duhet të ndalet së paku 48-72 orë para marrjes së mostrës për të siguruar rezultat të besueshëm.

Ajo rekomandoi testimin sindromik, i cili lejon identifikimin e më shumë se 30 patogjenëve në një mostrë klinike brenda 24 orëve, duke përfshirë bakteret, viruset dhe parazitët më të shpeshtë.

“Të gjithë patogjenët që transmetohen seksualisht janë të trajtueshëm. Shpesh mjafton një dozë e vetme antibiotiku për të kuruar një infeksion të zakonshëm si klamidia,” tha doktoresha Tafaj, duke theksuar nevojën për kontrolle periodike, veçanërisht për popullatën seksualisht aktive nga 15 deri në 49 vjeç.

Një tjetër problematikë që Tafaj evidentoi është stigma: “Shumë qytetarë e ndiejnë si turp të bëjnë teste për SST, edhe pse nuk ka asgjë të turpshme në kujdesin për shëndetin e tyre. Çdo infeksion është si çdo infeksion tjetër dhe duhet trajtuar pa frikë.”

Doktoresha përmendi gjithashtu rëndësinë e informimit të partnerit dhe trajtimit në çift për të ndërprerë zinxhirin e transmetimit: “Është një formë kujdesi ndaj tjetrit dhe një mënyrë për të shmangur përhapjen e infeksioneve.”