Inteligjenca Artificiale në numërimin në Tepelenë, Celibashi: Ishte i suksesshëm

Kreu i KQZ-së, Ilirjan Celibashi ka dalë në një deklaratë për mediat lidhur me zgjedhjet e pjesshme që u mbajtën të dielën në 5 bashki. Celibashi u ndal te testimi i IA në numërimin e votave në Tepelenë. Ai e ka cilësuar si një testim të suksesshëm.

“Në Tepelenë testuam përdorimin e AI në numërimin dhe vlerësimin e votave. Kjo mënyrë e numërimit asesi nuk kishte për qëllim të zëvendësonte mënyrën manuale që përcakton Kodi Zgjedhor.

Përdorimi i AI ishte test teknik, nëpërmjet të cilit ne si KQZ donim të shihnim sesa e dobishme mund të jetë në të ardhmen përdorimi i kësaj risie. Së paku përdorimin e AI në numërim e kemi parë si mjet të përshtatshëm për kontrollin e profesionalizmit dhe ndershmërisë të numëruesve dhe komisionarëve testi i kryer dje ishte i suksesshëm, dhe përmbushi të gjitha pritshmëritë e KQZ.

Leximi dhe numërimi fletëve u krye me sukses të plotë duke përdorur AI. U lexuan dhe analizuan në kohë reale nga programi përkatës kompjuterik. Në përgjithësi leximi dhe analiza e këtyre pamjeve prodhoi thuajse 100% të njëjtin rezultat të numërimit fizik. Pamjet e faqes ballore të fletës, u lexuan me saktësi të plotë nëpërmjet sistemit të AI. U konstatuan vetëm disa pasaktësi në leximin e pjesës së pasme të fletës së votimit,” tha ai.

LEXONI GJITHASHTU:

• Humbja në 5 bashki, Salianji: Nuk jemi në rrugën e duhur, PD ka humbur pasionin
• Berisha: Po na privohet e drejta e saj kushtetuese për të kontrolluar ekzekutivin