INTERPOL: Vaksina anti-Covid, target i rrjeteve kriminale

Agjencia globale e koordinimit të policisë INTERPOL ka paralajmëruar se rrjetet e organizuara kriminale mund të synojnë vaksinat anti-COVID-19 dhe mund të përpiqen të shesin doza të rreme.

INTERPOL, me seli në Francë, tha se kishte dhënë një alarm global për zbatimin e ligjit në 194 vendet e tij anëtare, duke i paralajmëruar që të përgatiten të përballen me  rrjetet e krimit të organizuar që synojnë vaksinat anti-COVID-19, si fizikisht ashtu edhe në internet.

“Ndërsa qeveritë po përgatiten të sigurojnë vaksinat, organizatat kriminale po planifikojnë të infiltrojnë ose të ndërpresin zinxhirët e furnizimit. Përmes faqeve të rreme të internetit, rrjetet kriminale do të synojnë gjithashtu anëtarë të dyshimtë të publikut, çka mund të paraqesë një rrezik për shëndetin dhe jetën e tyre “, u shpreh sekretari i përgjithshëm i INTERPOL-it, Jürgen Stock.

Në njoftimin e agjencisë, theksohet se ndërsa një numër i vaksinave anti-COVID-19 i afrohen aprovimit dhe shpërndarjes globale, sigurimi i zinxhirit të furnizimit dhe identifikimi i faqeve të internetit të paligjshme që shesin produkte të rreme do të jenë thelbësore.

“Përveç rreziqeve të porositjes së produkteve potencialisht të rrezikshme për jetën, një analizë nga Njësia e Krimit Kibernetik të INTERPOL-it zbuloi se nga 3000 faqet e internetit të lidhura me farmacitë e dyshuara për shitje të ilaçeve dhe pajisjeve mjekësore të paligjshme, rreth 1700 paraqesin kërcënime kibernetike”, shkruhet më tej në njoftimin në faqen zyrtare të INTERPOL-it.

Kjo deklaratë është cilësuar si njoftim portokalli, për të paralajmëruar një ngjarje, një person, një objekt ose një proces që përfaqëson një kërcënim serioz dhe të afërt për sigurinë publike.